रसुवा, १६ भदौ । भोटेकोशी नदीमा आएको विनाशकारी बाढीका कारण रसुवा जिल्लाका विभिन्न स्थानमा हालसम्म ६६ जनाको शव फेला परेको छ। जिल्ला प्रहरी कार्यालय रसुवाका अनुसार बाढीले पुर्‍याएको क्षतिको विवरण सङ्कलन र बेपत्ताहरूको खोजी गर्ने क्रममा यी शवहरू भेटिएका हुन्।

जिल्ला प्रहरी प्रमुख अशोक थापाका अनुसार सबैभन्दा बढी टिमुरे क्षेत्रमा ५० वटा शव फेला परेका छन्। त्यस्तै, बेत्रावतीमा १० र स्याफ्रुबेँसीमा ६ वटा शव भेटिएका छन्। फेला परेका कुल शवमध्ये हालसम्म ६ जनाको मात्रै पहिचान खुलेको छ। अन्य शवहरूको सनाखत गर्ने प्रक्रिया र तिनलाई जिल्ला सदरमुकाम धुन्चे ल्याउने तयारी भइरहेको प्रहरीले जनाएको छ।

बाढी प्रभावित क्षेत्रबाट हालसम्म ६०० भन्दा बढी नागरिकको जीवितै उद्धार गरिएको छ। विस्थापित परिवारहरूलाई सुरक्षित स्थानमा स्थानान्तरण गरिएको छ: बेत्रावती कैँदलटारका विस्थापित: काठमाडौँको तारकेश्वर नगरपालिकास्थित शान्ति टोलमा।
टिमुरे र स्याफ्रुबेँसीका विस्थापित: काठमाडौँको रानीवनस्थित पहेँलो गुम्बा र धुन्चेको टुर्कुछिलिङ गुम्बामा।
अन्य प्रभावित: दक्षिणी रसुवाका भीमसेन र शिवालय प्राथमिक विद्यालयमा। विस्थापित बालबालिकाहरूका लागि विभिन्न गैरसरकारी संस्थाहरूले पोषणयुक्त खाना र दूध वितरण गरिरहेका छन्।

बाढीले पुल र सडक सञ्जाल पूर्ण रूपमा ध्वस्त पारेका कारण रसुवाका माथिल्ला र पश्चिमी क्षेत्रका बस्तीहरूमा स्थलगत पहुँच टुटेको छ। सहायक प्रमुख जिल्ला अधिकारी ध्रुवप्रसाद अधिकारीका अनुसार थोमन, चिलिमे, गोल्जुङ, हाकु, लाहापेयौवा र टिमुरेका भित्री बस्तीहरूमा हेलिकप्टरमार्फत खाद्यान्न र औषधि ढुवानी भइरहेको छ।

जिल्लाका अधिकांश क्षेत्रमा सञ्चार सम्पर्क पुनः स्थापित भएको छ। विद्युत् सेवा अझै अवरुद्ध रहेकाले रसुवा–नुवाकोट पर्यटन समाजले गाडीमा जेनेरेटर राखेर ‘घुम्ती मोबाइल चार्ज’ सेवा सञ्चालन गरेको छ, जसबाट ५०० भन्दा बढी स्थानीय लाभान्वित भएका छन्।
यसैबीच, नेपाल विद्युत् प्राधिकरणले विद्युत् आपूर्ति नियमित गर्न काठमाडौँको बालाजुदेखि नुवाकोट हुँदै धुन्चेसम्म नयाँ वैकल्पिक प्रसारण लाइन विस्तारको कामलाई तीव्रता दिएको छ।