काठमाडौँ, २२ भदौ । राष्ट्रपति रामचन्द्र पौडेलले रसुवाको भोटेकोशी बाढीबाट सिर्जना भएको महाविपत्तिको सामना गर्न सम्पूर्ण देशवासीलाई एकताबद्ध भएर उभिन आह्वान गर्नुभएको छ । सोमबार बाढी प्रभावित क्षेत्रको स्थलगत निरीक्षण गरेपछि राष्ट्रका नाममा विशेष सम्बोधन गर्दै उहाँले सङ्कटको यस घडीमा राजनीतिक सङ्कीर्णताभन्दा माथि उठेर मानवीय सेवामा जुट्न आग्रह गर्नुभएको हो ।

राष्ट्रपति पौडेलले विपद्को समयमा एक–अर्कामाथि औँला उठाउनु वा राजनीतिक विवादमा अल्झिनु प्रत्युत्पादक हुने बताउनुभयो । “यो विभाजनको समय होइन, न त एकअर्कालाई दोषारोपण गर्ने वा राजनीतिक विवाद र टकरावमा अल्झिने समय नै हो,” उहाँले भन्नुभयो, “अहिलेको आवश्यकता केवल राष्ट्रिय एकता र ऐक्यबद्धता प्रदर्शन गर्नु हो ।”

सम्बोधनका क्रममा राष्ट्रपतिले सम्पूर्ण राजनीतिक दल, निर्वाचित जनप्रतिनिधि, नागरिक समाज, निजी क्षेत्र, व्यवसायी समुदाय र मानवीय सहायतामा संलग्न सङ्घसंस्थाहरूलाई एकजुट हुन अपिल गर्नुभयो । उहाँले सबैको सामूहिक प्रयासबाट मात्रै बाढी पीडितको उद्धार, राहत र पुनःस्थापना कार्य प्रभावकारी हुन सक्ने उल्लेख गर्नुभयो ।

बाढीले पुर्‍याएको अकल्पनीय जनधनको क्षतिप्रति गहिरो दुःख व्यक्त गर्दै राष्ट्रपति पौडेलले प्रभावित क्षेत्रका नागरिकको पीडामा राज्य साथै रहेको विश्वास दिलाउनुभयो । उहाँले उद्धारमा खटिएका सुरक्षाकर्मी र स्वयंसेवकहरूको हौसला बढाउँदै पुनःनिर्माणको कामलाई द्रुत गतिमा अघि बढाउन सरकारको ध्यानाकर्षण समेत गराउनुभएको छ ।

गत भदौ १० गतेको विनाशकारी बाढीले रसुवा र आसपासका जिल्लामा ठुलो क्षति पुर्‍याएपछि मुलुक यतिबेला शोकमा छ भने सरकारले आज सोमबार राष्ट्रिय शोक समेत घोषणा गरेको छ ।