उत्तर कोरियाद्वारा विशाल ‘संयुक्त लाइभ-फायर’ अभ्यास, बलिस्टिक क्षेप्यास्त्र र ड्रोनसहित सैन्य शक्ति प्रदर्शन

काठमाडौं ।  उत्तर कोरियाले क्षेप्यास्त्र, तोपखाना र ड्रोनसहितको संयुक्त ‘लाइभ-फायर’ (प्रत्यक्ष गोलीबारी) अभ्यास गर्दै आफ्नो विशाल विनाशकारी सैन्य क्षमता प्रदर्शन गरेको दाबी गरेको छ।

उत्तर कोरियाली सरकारी सञ्चारमाध्यम ‘कोरियन सेन्ट्रल न्युज एजेन्सी’ (KCNA) का अनुसार शनिबार सञ्चालित यो अभ्यास मुख्यतया एकीकृत हतियार नियन्त्रण प्रणालीको क्षमता परीक्षणमा केन्द्रित थियो। अभ्यासको निरीक्षणपछि मार्सल पाक जोङ चोनले एकीकृत हतियार प्रणालीले ठूलो परिमाणमा एकसाथ प्रहार गर्न सक्ने उच्च क्षमता प्रदर्शन गरेको दाबी गर्नुभयो।

दक्षिण कोरियाली सेनाका अनुसार सोही दिन उत्तर कोरियाको वोनसन क्षेत्रबाट छोटो दूरीको ब्यालेस्टिक क्षेप्यास्त्र प्रक्षेपण गरिएको थियो, जसले पूर्वी समुद्रतर्फ करिब २५० किलोमिटरको दूरी तय गरेको थियो। यद्यपि, उत्तर कोरियाले दाबी गरेका हतियार परीक्षणहरूलाई स्वतन्त्र रूपमा पुष्टि गर्न भने कठिन मानिन्छ।

अमेरिका-दक्षिण कोरिया अभ्यासलगत्तै जवाफी कदम

यो सैन्य अभ्यास अमेरिका, दक्षिण कोरिया र जापानको संयुक्त सैन्य अभ्यास सकिएको भोलिपल्टै आयोजना गरिएको हो। अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ उनसँगको सम्बन्ध सुधारका लागि अगस्टमा दक्षिण कोरियासँगको प्रमुख सैन्य अभ्यास घटाउन निर्देशन दिनुभएको थियो। तर, उत्तर कोरियाले भने अभ्यासको समय छोट्याउँदैमा त्यसको ‘आक्रामक र उत्तेजक प्रकृति’ नबदलिने भन्दै अमेरिकी प्रस्ताव अस्वीकार गरेको थियो।

विश्लेषकहरूका अनुसार उत्तर कोरियाले निरन्तर बढाउँदै लगेको आणविक हतियार भण्डारका साथै रुस र चीनसँग प्रगाढ बन्दै गएको सम्बन्धका कारण किम जोङ उन अमेरिकासँगको सम्भावित वार्तामा विगतको तुलनामा निकै बलियो स्थितिमा देखिएका छन्।

नेता किमले अमेरिकाले आफ्नो देशप्रतिको ‘शत्रुतापूर्ण नीति’ त्यागेर आणविक शक्ति राष्ट्रको हैसियतलाई स्वीकार गरेमा मात्र वार्तामा फर्कन सकिने सर्त राख्दै आउनुभएको छ।