काठमाडौँ, १२ असोजः पछिल्लो २४ घण्टामा देशभर दुई सय ७२ वटा विपद्का घटना भएका छन् । ती घटनामा परी २१ जनाको मृत्यु भएको छ भने चार जना बेपत्ता र २६ जना घाइते भएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता शान्ति महतका अनुसार असोज ११ गते बिहान १० बजेदेखि असोज १२ गते बिहान १० बजेसम्मको अवधिमा ती विपद्का घटना भएका हुन् ।

प्राधिकरणका अनुसार उक्त अवधिमा सबैभन्दा बढी पहिरोका ९७ वटा घटना भएका छन् । पहिरोमा परी १९ जनाको मृत्यु, चार जना बेपत्ता र चार जना घाइते भएका छन् ।

यसैगरी अविरल वर्षाका ८०, बाढीका ५७, सर्पदंशका १७, आगलागीका आठ, हावाहुरीका आठ, जनावर आक्रमणका चार तथा हिमपातको एउटा घटना भएको प्राधिकरणले जनाएको छ ।

बाढीका घटनामा मानवीय क्षति नभए पनि ४१५ जनाको उद्धार गरिएको छ । यस्तै, अविरल वर्षाका कारण जोखिममा परेका सात सय जनाको उद्धार गरिएको प्राधिकरणको विवरणमा उल्लेख छ ।

विपद्का कारण देशभर ४८ सडकखण्ड अवरुद्ध भएका छन् भने १२१ चौपायाको क्षति भएको छ । विपद्जन्य घटनाबाट रु एक करोड ९१ लाख ६६ हजार बराबरको अनुमानित आर्थिक क्षति भएको प्राधिकरणले जनाएको छ ।

पछिल्लो २४ घण्टामा भएका विपद्का घटनामध्ये पहिरो, बाढी र अविरल वर्षाका घटना प्रमुख रहेका छन् । प्रभावित क्षेत्रमा सुरक्षाकर्मी तथा सम्बन्धित निकायबाट उद्धार, खोजी तथा आवश्यक व्यवस्थापनका कार्य जारी रहेको प्राधिकरणले जनाएको छ ।