सिरहा, १३ कात्तिक । सिरहा नगरपालिका–१३ मल्हनियाबाट भारी मात्रामा अवैध लागूऔषध खैरो हेरोइनसहित दुई जना भारतीय नागरिकलाई प्रहरीले पक्राउ गरेको छ।

लागूऔषध नियन्त्रण ब्यूरो कोटेश्वरबाट खटिएको विशेष प्रहरी टोलीले बिहीबार बिहान उनीहरूलाई नियन्त्रणमा लिएको हो।

पक्राउ पर्नेमा भारतीय नागरिक

प्रहरीका अनुसार पक्राउ पर्नेमा भारतको मधुबनी जिल्लास्थित बेला पञ्चायत–८ निवासी ४४ वर्षीय लाल बाबु सिंह र २६ वर्षीय धर्मेन्द्र दास रहेका छन्।

बरामद गरिएको परिमाण र सामाग्री

गोप्य सूचनाको आधारमा खटिएको प्रहरी टोलीले उनीहरूको साथबाट निम्न सामग्री बरामद गरेको छ:

• अवैध खैरो हेरोइन: ३ सय १२ ग्राम

• यातायात साधन: उनीहरूले प्रयोग गरेको बीआर–३२४ भी ७५७४ नम्बरको मोटरसाइकल

खुला सिमानाको फाइदा उठाइ भारतबाट नेपालतर्फ लागूऔषध तस्करी भइरहेको विशेष सुराकीको आधारमा प्रहरीले यो सफलता हासिल गरेको हो। पक्राउ परेका दुवै जनालाई आवश्यक अनुसन्धान तथा कारबाहीका लागि स्थानीय प्रहरी कार्यालयको हिरासतमा राखिएको र यस सम्बन्धमा थप अनुसन्धान भइरहेको प्रहरीले जनाएको छ।