काठमाडौँ, १३ कात्तिकः कृषि फार्म सञ्चालनका लागि सरकारी सहुलियत अनुदान उपलब्ध गराइदिने प्रलोभन देखाएर पाँच करोड ८० लाख रुपियाँ ठगी गरेको आरोपमा प्रहरीले दुई जनालाई पक्राउ गरेको छ ।

केन्द्रीय प्रहरी समाचारकक्षका अनुसार पक्राउ पर्नेमा काठमाडौँ महानगरपालिका १३ ताहाचलका ५२ वर्षीय तिलक बुढाथोकी भन्ने श्रीकृष्ण महर्जन र ललितपुर महानगरपालिका १४ नखिपोटका ६० वर्षीय प्रेमनारायण खनाल रहेका छन् ।

केन्द्रीय अनुसन्धान ब्युरो (सीआईबी) को टोलीले उनीहरूलाई बिहीबार पक्राउ गरेको हो ।

प्रहरीका अनुसार पक्राउ परेका दुवै जनाले सिंहदरबारस्थित विभिन्न मन्त्रालयका कर्मचारीसँग आफ्नो राम्रो चिनजान रहेको र त्यसकै आधारमा कृषि फार्मका लागि सहुलियत अनुदान सहजै उपलब्ध गराइदिन सक्ने भन्दै पीडितलाई विश्वासमा पारेका थिए ।

सोही प्रलोभनमा पारेर उनीहरूले पीडितबाट रु पाँच करोड ८० लाख रकम ठगी गरेको प्रारम्भिक अनुसन्धानबाट खुलेको प्रहरीले जनाएको छ ।

उनीहरूविरुद्ध काठमाडौँ जिल्ला अदालतबाट म्याद थपको अनुमति लिई हिरासतमा राखेर थप अनुसन्धान भइरहेको केन्द्रीय प्रहरी समाचारकक्षले जनाएको छ ।