धनुषामा जन्ती बोकेको जीप दुर्घटना हुँदा पाँचको मृत्यु, नौ जना घाइते

धनुषा, १७ मंसिर । धनुषामा जन्ती बोकेको जीप दुर्घटना हुँदा पाँच जनाको मृत्यु भएको छ भने नौ जना घाइते भएका छन् ।

जिल्ला प्रहरी कार्यालय धनुषाका अनुसार जन्ती बोकेको बा१ज ८२९३ नम्बरको जीप आज बिहान दुर्घटना भएको हो । दुर्घटनामा पाँच जनाको मृत्यु भएकाे छ भने नौ जना घाइते भएकाे धनुषाका प्रहरी उपरीक्षक वसन्त रजौरेले बताए ।

जन्ती महोत्तरीको पिपरा गाउँपालिका गमहरियाका हुन् । जन्ती इटहरीबाट फर्किंदै गर्दा आज बिहान ४ः३० बजे पूर्वपश्चिम राजमार्गको वीरेन्द्र बजारमा दुर्घटनामा परेका थिए ।

मृत्यु हुनेमा तीन महिला, एक बालक र एक पुरुष छन् । मृत्यु हुनेमा पिपरा गाउँपालिकाका ११ वर्षीय बालक एस कुमार, धनुषाको मुखियापट्टी मुसहरनिया तुल्सीयाहीका ३५ वर्षीय रुवीकुमारी साहको परिचय खुलेको छ भने अन्यको परिचय खुलेको छैन ।