बागलुङ, १९ वैशाख । नेपालको एकमात्र सिकार आरक्ष ढोरपाटनमा यस वर्षको दोस्रो सिकार याम सम्पन्न भएको छ। यस याममा ११ नाउर र ७ झारलको सिकार गरिएको छ। वन्यजन्तु तथा राष्ट्रिय निकुञ्ज विभागले गत माघ १५ गते बोलपत्र आह्वान गरी १३ नाउर, १० झारल र १२ बँदेल गरी कुल ३५ वन्यजन्तुको सिकार अनुमति प्रदान गरेको थियो। यद्यपि, बँदेलको सिकार भने भएन।

हिमालयन वाइल्डलाइफ आउटफिर्टस प्रालि, ट्रयाक्स एन्ड ट्रेल्स प्रालि, हिमालयन सफारिज प्रालि, ग्लोबल सफारिज नेपाल, नेपाल ट्राभल एक्सपिडिसन र ओपन नेपाल वाइल्डलाइफ सफारिज गरी ६ वटा कम्पनीले सिकारको अनुमति पाएका थिए। अनुमतिप्राप्त सिकारीहरू फागुने, सुनदह, घुस्तुङ, दोगाडी लगायतका ब्लकमा सिकार खेल्न पुगेका थिए।

ढोरपाटन सिकार आरक्ष कार्यालयका रेन्जर सागर सुवेदीका अनुसार चैत २६ गतेदेखि सिकारीहरू ढोरपाटन आउन थालेका थिए। सिकारीहरूले सुनदहमा २ नाउर र २ झारल, घुस्तुङमा ३ नाउर र ३ झारल, दोगाडीमा ४ नाउर र १ झारल, फागुनेमा १ नाउर र १ झारल तथा बार्सेमा १ नाउरको सिकार गरेका हुन्। वैशाख १६ गतेसम्म सिकार खेल्ने अनुमति दिइएको थियो।

कम्पनीहरूलाई प्रदान गरिएको सिकार कोटा र वास्तविक सिकार संख्यामा केही फरक देखिएको छ। उदाहरणका लागि, हिमालयन वाइल्डलाइफ आउटफिर्टसले २ नाउर, २ झारल र २ बँदेलको सिकार अनुमति पाए पनि १ नाउर र १ झारल मात्र सिकार गरेको छ। ट्रयाक्स एन्ड ट्रेल्सले भने आफ्नो कोटा अनुसार २ नाउर र २ झारलको सिकार गरेको छ।

यस वर्षको दोस्रो सिकार याममा अमेरिका, अर्जेन्टिना, स्पेन र फ्रान्सबाट सिकारीहरू आएका थिए। ढोरपाटनमा प्रत्येक वर्ष असोज–मंसिर (पहिलो याम) र फागुन–वैशाख (दोस्रो याम) गरी दुई याममा सिकार खुल्ला गरिन्छ।