म्याग्देका ४८ विपन्न परिवारको ‘आफ्नो घर’को सपना साकार, गाउँपालिकाले बनाइदियो नयाँ बास

तनहुँ, ३ असार । तनहुँको म्याग्दे गाउँपालिकाले ४८ विपन्न तथा घरविहीन परिवारलाई नयाँ घर हस्तान्तरण गरेपछि उनीहरूको मुहारमा खुसी छाएको छ । गाउँपालिकाको ‘नमूना आवास कार्यक्रम’ अन्तर्गत जोखिमयुक्त घरमा बस्दै आएका र घरविहीन नागरिकको ‘आफ्नो घर’को सपना पूरा भएको हो ।

वर्षौंदेखि जीर्ण घरमा बस्दै आएका वा आफ्नो कमाइले कहिल्यै घर बनाउन नसक्ने अवस्थामा रहेका परिवारले गाउँपालिकामार्फत सुविधासम्पन्न घर पाएका छन् । वडा नं ७ हर्कपुरका सुकमान श्रेष्ठले गाउँमै यस्तो राम्रो घर पाउँदा आफू अत्यन्त हर्षित भएको बताए । “गाउँपालिकाले हाम्रो लागि ठूलो गुण लगायो, अब ढुक्कले बस्न पाइने भयो,” उनले भने ।

आफ्नो आयले घर बनाउने सपना कहिल्यै पूरा नहुने सोचेकी वडा नं २ जामुनेकी विष्णुमाया सुनारले गाउँपालिकाले जीवनभरको सपना साकार पारिदिएकोमा आभार व्यक्त गरिन् । “हामीजस्ता गरिबलाई कसले हेर्छ र भन्ने थियो, तर सरकारले नै घर बनाइदियो,” उनले भनिन् । यस्तै, वडा नं ४ धोद्रेका लक्ष्मण परियारले आफूजस्ता सम्पत्तिविहीनलाई निःशुल्क घर र खानेपानीको व्यवस्था गरिदिएकोमा गाउँपालिकाप्रति कृतज्ञता व्यक्त गरे ।

कसरी पूरा भयो योजना?

गाउँपालिकाका अध्यक्ष श्रीप्रसाद श्रेष्ठका अनुसार, सम्बन्धित वडाहरूको सिफारिसका आधारमा वास्तविक विपन्न पहिचान गरी घर उपलब्ध गराइएको हो । “यी घरहरू १० वर्षसम्म बेचबिखन गर्न, बैंकमा धितो राख्न वा भाडामा दिन पाइने छैन,” अध्यक्ष श्रेष्ठले भने, “यो कार्यक्रमले नागरिकलाई सुरक्षित आवासको सुनिश्चितता गरेको छ ।” जग्गा नहुने लाभग्राहीलाई छिमेकीले निःशुल्क जग्गा उपलब्ध गराएर सहयोग गरेको र केहीको आफ्नै जग्गामा घर निर्माण गरिएको गाउँपालिकाले जनाएको छ ।

दुई चरणमा सम्पन्न भयो निर्माण

यो महत्वाकांक्षी कार्यक्रम दुई चरणमा सम्पन्न भएको हो । गाउँपालिकाका प्रमुख प्रशासकीय अधिकृत नारायणप्रसाद अधिकारीका अनुसार, संघीय सरकारको समपूरक कोष र गाउँपालिकाको संयुक्त लगानीमा घरहरू निर्माण गरिएका हुन् ।

• पहिलो चरण: आर्थिक वर्ष २०८०/८१ मा रु ८१ लाख ४३ हजारको लागतमा १६ वटा घर निर्माण गरिएको थियो ।

• दोस्रो चरण: चालु आर्थिक वर्षमा रु दुई करोड ७३ लाख ५९ हजारको लागतमा थप ३२ वटा घर निर्माण सम्पन्न भएका छन् ।

निर्माण गरिएका घरहरू गाउँपालिकाका सातै वडामा समानुपातिक रूपमा वितरण गरिएको छ । जसअनुसार वडा नं १ र २ मा ७/७ वटा, वडा नं ३, ५ र ६ मा ६/६ वटा, तथा वडा नं ४ र ७ मा ८/८ वटा घर निर्माण गरी हस्तान्तरण गरिएको हो ।