काठमाडौँ, १५ पुस । नेपाली कांग्रेसका सभापति शेरबहादुर देउवाले पार्टीको १५औँ महाधिवेशन नियमित प्रक्रियाबाटै सम्पन्न गर्नुपर्नेमा जोड दिनुभएको छ। मंगलबार केही सञ्चारकर्मीहरूसँगको भेटघाटमा सभापति देउवाले विशेष महाधिवेशनको सम्भावनालाई ठाडै अस्वीकार गर्दै निर्धारित पद्धतिअनुसार अघि बढ्न आग्रह गर्नुभयो।

सभापति देउवाले आगामी आम निर्वाचनअघि महाधिवेशन गर्दा पार्टीभित्र हुने आन्तरिक प्रतिस्पर्धाको नकारात्मक असर निर्वाचन परिणाममा पर्न सक्ने भन्दै चिन्ता व्यक्त गर्नुभयो। “निर्वाचनअघि महाधिवेशन गर्दा पार्टीभित्रको प्रतिस्पर्धाको असर पर्न सक्छ भनेर मैले भन्दै आएको छु,” देउवाले भन्नुभयो, “तर साथीहरू अगाडि नै महाधिवेशन गर्ने पक्षमा हुनुहुन्छ भने म त्यसमा बाधक बन्ने छैन।”

आगामी महाधिवेशनमा आफ्नो भूमिकाबारे स्पष्ट पार्दै देउवाले आफू विधानतः पुनः सभापतिको उम्मेदवार बन्न नमिल्ने र आफ्नो व्यक्तिगत इच्छा पनि नरहेकाले यस पटक तटस्थ रहने बताउनुभयो। उहाँले १५औँ महाधिवेशनमा आफू कसैको पक्षमा नलाग्ने बरु योग्य नेतृत्वका लागि अरुलाई प्रोत्साहन मात्र गर्ने स्पष्ट पार्नुभयो।

पार्टीभित्र चर्चामा रहेको ‘विशेष महाधिवेशन’ का सम्बन्धमा देउवाले त्यसले थप विवाद निम्त्याउने दाबी गर्नुभयो। “विशेष महाधिवेशनमा गयो भने त्यसको विधि र प्रक्रियालाई लिएर अर्को नयाँ झगडा सुरु हुन्छ,” उहाँले भन्नुभयो, “त्यसैले विशेष महाधिवेशन हुँदै हुँदैन, नियमित महाधिवेशन नै मिलेर गरौँ।”

देउवाको यो भनाइले कांग्रेसभित्र आगामी महाधिवेशनको समय र प्रकृतिलाई लिएर भइरहेको बहसलाई थप तताएको छ। पार्टीभित्रको आन्तरिक व्यवस्थापन र आगामी निर्वाचनको रणनीतिलाई सन्तुलनमा राख्न देउवाले सहमति र सहकार्यको बाटो रोज्नुपर्नेमा जोड दिनुभएको छ।