काठमाडौँ, १६ माघ । नेपालमा हाल पश्चिमी वायुको आंशिक प्रभाव कायमै रहेकाले देशका विभिन्न भागको मौसममा फेरबदल आएको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार आज उच्च पहाडी तथा हिमाली भेगमा हिमपात र वर्षाको सम्भावना रहेको छ।

आज दिउँसो कोशी, बागमती र गण्डकी प्रदेशका उच्च पहाडी तथा हिमाली भू-भागमा आंशिक बदली रहनेछ। महाशाखाका अनुसार कोशी र गण्डकी प्रदेशका उच्च पहाडी तथा हिमाली क्षेत्रका एक-दुई स्थानमा हल्का वर्षा र हिमपातको सम्भावना छ। देशका अन्य बाँकी भू-भागमा भने मौसम मुख्यतया सफा रहनेछ।

यता, तराईका भू-भागमा भने बिहानैदेखि हुस्सु र कुहिरोले जनजीवन प्रभावित पारेको छ। विशेष गरी कोशी र मधेस प्रदेशका अधिकांश स्थानमा अहिले बाक्लो हुस्सु लागेको छ।

आज राति कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका उच्च पहाडी तथा हिमाली भागमा आंशिक बदली हुनेछ भने अन्य क्षेत्रमा मौसम सफा रहनेछ। राति पनि तराईका केही स्थानमा हुस्सु लाग्ने सम्भावना रहेको मौसमविद्हरूले बताएका छन्।

महाशाखाले हिमपात, वर्षा र बाक्लो हुस्सुका कारण दैनिक जनजीवनमा प्रभाव पर्न सक्ने चेतावनी दिएको छ। हुस्सुका कारण तराईका विभिन्न विमानस्थलहरूमा दृश्यता (Visibility) कम हुँदा हवाई उडानमा ढिलाइ वा अवरोध हुन सक्ने र सडक यातायातमा पनि कठिनाइ हुने भएकाले चालकहरूलाई विशेष सतर्कता अपनाउन अनुरोध गरिएको छ।