म्याग्दी, ८ कात्तिक ।  पूर्वी क्षितिजमा लाली चढ्दै गर्दा पुनहिलको टाकुरा पर्यटकले भरिन थाल्छ। कोही क्यामेरा तेस्र्याएर हिमालको दृश्य कैद गर्न व्यस्त हुन्छन् त कोही मोबाइलमा सूर्योदयको सुन्दर क्षण समेट्छन्। चराचुरुङ्गीको चिरबिरसँगै बिस्तारै देखिन थाल्ने हिमशृङ्खलामा सूर्यको पहिलो किरण पर्दा सेता हिमाल सुनौलो रङमा चम्किन्छन्। प्रकृतिको यही अनुपम दृश्यले पर्यटकलाई मन्त्रमुग्ध बनाउँछ।

मनसुन सकिएसँगै मौसम खुलेर आकाश नीलो हुन थालेपछि म्याग्दीको अन्नपूर्ण गाउँपालिका–६ स्थित घोडेपानी–पुनहिलमा पर्यटकको चहलपहल बढेको छ। दसैँ–तिहारको बिदा मनाउन, हिमाली सौन्दर्य नियाल्न र प्रकृतिसँग रमाउन चाहने आन्तरिक तथा बाह्य पर्यटकको रोजाइमा यो गन्तव्य पर्न थालेको हो।

दसैँअघि सुनसान बनेको घोडेपानी–पुनहिलमा कात्तिक लागेसँगै पर्यटकको आगमन बढ्न थालेको घोडेपानीका होटल व्यवसायीसमेत रहनुभएका अन्नपूर्ण गाउँपालिकाका पूर्वअध्यक्ष डमबहादुर पुनले बताउनुभयो। उहाँका अनुसार विपद्का कारण असोज महिनामा पर्यटकको आगमन घटेको थियो।

“कात्तिक महिनाको सुरुआतसँगै दैनिक दुई सय जना विदेशी र ५० जनाको हाराहारीमा नेपाली पर्यटक आउन थालेका छन्”, उहाँले भन्नुभयो।

पोखराबाट घुम्न आउनुभएका सन्तोष बराललाई घोडेपानी–पुनहिलको प्राकृतिक सौन्दर्यले मोहित बनाएको छ। सहरको व्यस्त दैनिकीबाट केही समय टाढा रहेर हिमाल, वनजङ्गल र शान्त वातावरणमा रमाउन पाउँदा यात्रा स्मरणीय बनेको उहाँले बताउनुभयो।

चाडपर्वको बिदालाई घुमफिर र नयाँ अनुभवका लागि उपयोग गर्ने चलन बढ्दै जाँदा छोटो अवधिमै प्राकृतिक सौन्दर्यको आनन्द लिन सकिने गन्तव्यप्रति पर्यटकको आकर्षण पनि बढेको छ।

एउटै थलोबाट १५ भन्दा बढी हिमालको दृश्यावलोकन

समुद्री सतहदेखि तीन हजार २१० मिटर उचाइमा रहेको पुनहिल घोडेपानी क्षेत्रको प्रमुख आकर्षण हो। यहाँबाट धौलागिरि, अन्नपूर्ण, नीलगिरि, गुर्जा, मानापाथी, माछापुच्छ्रे, मनास्लु र बराह शिखरलगायत १५ भन्दा बढी हिमाली टाकुराको दृश्यावलोकन गर्न सकिन्छ।

मौसम खुलेका बेला टाढाटाढासम्म फैलिएका हिमशृङ्खला आँखैअगाडि उभिएझैँ देखिने स्थानीय व्यवसायी सुरेश पुनले बताउनुभयो। सूर्योदयसँगै हिमाली दृश्यावलोकनका लागि पर्यटक बिहानै पुनहिल पुग्ने गर्छन्। अनुकूल मौसममा यहाँबाट देखिने हिमालको लहर र सुनौलो प्रकाशले यात्राको आकर्षण थप बढाउँछ।

बिहान पुनहिलमा सूर्योदय हेरेपछि पर्यटक घोडेपानी फर्केर आसपासका वनजङ्गल, गाउँबस्ती र प्राकृतिक सम्पदाको अवलोकन गर्छन्। हरियाली, स्वच्छ हावा र शान्त वातावरणले पदयात्राको थकान बिर्साउन सहयोग गर्ने पोखराकी रोजी श्रेष्ठले बताउनुभयो।

“बिहान हिमालमा उदाउने सूर्य, दिनभरि देखिने हिमशृङ्खला र प्रकृतिको शान्त वातावरणले लोभ्यायो”, उहाँले भन्नुभयो, “प्रकृतिप्रेमीका लागि चाडपर्वको बिदा मनाउन र छोटो पदयात्रा गर्न घोडेपानी–पुनहिल उपयुक्त गन्तव्य रहेछ।”

पर्यटक बढेसँगै होटल व्यवसायी व्यस्त

पर्यटकको आगमन बढेसँगै घोडेपानीका होटल व्यवसायीको व्यस्तता पनि बढेको छ। होटल व्यवसायी टेकसर बुद्धुजा पुनका अनुसार यहाँ दैनिक करिब एक हजार जनालाई बास उपलब्ध गराउन सक्ने क्षमताका २५ वटा सुविधायुक्त होटल सञ्चालनमा छन्।

चाडपर्वको बिदा र अनुकूल मौसमका कारण आगामी दिनमा पर्यटकको सङ्ख्या अझै बढ्ने अपेक्षा गरिएको उहाँले बताउनुभयो। हिमाली दृश्यावलोकन, सूर्योदय र प्राकृतिक वातावरणका कारण घोडेपानी–पुनहिल छोटो अवधिको पदयात्रा गर्न चाहने आन्तरिक तथा विदेशी पर्यटकका लागि आकर्षक गन्तव्य बनेको छ।

विश्वप्रसिद्ध अन्नपूर्ण चक्रीय पदमार्गमा पर्ने यस क्षेत्रमा पदयात्राका लागि विभिन्न मार्ग उपलब्ध छन्। पोखराबाट कास्कीको नयाँपुल हुँदै उल्लेरीको बाटो पैदल यात्रा गरेर घोडेपानी पुग्न सकिन्छ। त्यस्तै, म्याग्दीको पोखरेबगर, घार र शिख हुँदै सडकमार्गबाट पनि यहाँ पुग्न सकिन्छ। घोडेपानीबाट करिब आधा घण्टा पैदल हिँडेपछि पुनहिलको टाकुरामा पुगिन्छ।

पर्यटक पथप्रदर्शक सुन्दर बन्जाराका अनुसार यहाँको मुख्य आकर्षण हिमाली दृश्य र सूर्योदय हो। अनुकूल मौसममा एउटै स्थानबाट धेरै हिमालको अवलोकन गर्न सकिने भएकाले घोडेपानी–पुनहिलले आन्तरिक तथा बाह्य पर्यटकलाई आकर्षित गर्दै आएको उहाँले बताउनुभयो।

चरन क्षेत्रदेखि अन्तरराष्ट्रिय पर्यटकीय गन्तव्यसम्म

घोडेपानी र पुनहिलको पर्यटन विकाससँग जोडिएको इतिहास पनि रोचक छ। कुनै समय स्थानीय किसानले पशु चराउने क्षेत्रका रूपमा प्रयोग गर्दै आएको लुङटुङ डाँडा अहिले पुनहिलका नामले अन्तरराष्ट्रिय पर्यटन बजारमा परिचित छ।

स्थानीय व्यवसायीका अनुसार भारतीय सेनाबाट सेवा निवृत्त स्वर्गीय मेजर टेकबहादुर पुनले यस डाँडाको नामकरण गर्दै पर्यटन विकासको जग बसाल्नुभएको थियो। उहाँको स्मृतिमा पुनहिलमा दृश्यावलोकनस्थलसमेत निर्माण गरिएको छ। अन्नपूर्ण संरक्षण क्षेत्र आयोजनामा समेटिएपछि यस क्षेत्रको प्रचारप्रसारले अन्तरराष्ट्रियस्तरमा विस्तार पाएको हो।

हिमाली दृश्यसँगै जैविक विविधता, वनजङ्गल, स्थानीय संस्कृति र गाउँले जीवनशैली पनि यहाँका थप आकर्षण हुन्। प्राकृतिक सम्पदाको अवलोकनसँगै स्थानीय रहनसहन र संस्कृतिको अनुभव लिन पाइनु यस क्षेत्रको विशेषता हो।

विपद्का बीच सुरक्षित गन्तव्यको सन्देश

पछिल्लो समय विभिन्न क्षेत्रमा आएको बाढीपहिरोले नेपालको पर्यटन क्षेत्रमा असर पारेको भए पनि घोडेपानी–पुनहिल, घान्द्रुक र अन्नपूर्ण आधार शिविर क्षेत्रमा प्रत्यक्ष असर नपरेको पर्यटन व्यवसायीले बताएका छन्।

विपद्बाट प्रभावित क्षेत्रका घटनाका कारण समग्र नेपालको पर्यटन असुरक्षित रहेको सन्देश फैलिन नदिन सुरक्षित गन्तव्यको वास्तविक अवस्था र त्यहाँको पर्यटन गतिविधिबारे प्रभावकारी प्रचारप्रसार गर्नुपर्ने उनीहरूको भनाइ छ।

मनसुनपछि खुलेको मौसम, हिमालको सुनौलो दृश्य, चिसो हावा र शान्त वातावरणले घोडेपानी–पुनहिलमा पर्यटकको आकर्षण बढाएको छ। प्रकृतिसँग नजिक भएर केही दिन बिताउन चाहनेहरूका लागि यो गन्तव्य केवल हिमाल हेर्ने थलो मात्र नभई सहरको कोलाहलबाट टाढा रहेर नयाँ ऊर्जा र अनुभव बटुल्ने अवसरसमेत बनेको छ।