प्रवासी नेपालीको सहयोगमा विद्यालय भवन निर्माण
काठमाडौँ, मसिर ३ । प्रवासी नेपालीको आर्थिक सहयोगमा बेनी नगरपालिका–६, जामुनाखर्कस्थित आधारभूत विद्यालयको दुईकोठे भवन निर्माण भएको छ । गैरआवासीय नेपाली सङ्घ (एनआरएनए) बहराइन र नेपाली क्लब अफ बहराइनको आर्थिक सहयोगमा भवन निर्माण गरिएको विद्यालयका प्रधानाध्यापक ठाकुरप्रसाद पौडेलले जानकारी दिनुभयो ।
उहाँका अनुसार भवन निर्माणका लागि बहराइनस्थित सहयोगी संस्थाबाट पाँच लाख रुपियाँ र स्थानीयवासीबाट दुई लाख रुपियाँ सङ्कलन गरिएको थियो । कुल सात लाख रुपियाँको लागतमा विद्यालय भवन निर्माण सम्पन्न भएको हो ।
कक्षा ३ सम्म पठनपाठन हुने उक्त विद्यालयमा हाल १६ जना बालबालिका अध्ययनरत छन् । नयाँ भवन निर्माण भएपछि विद्यालयको भौतिक पूर्वाधारमा सुधार हुनुका साथै पठनपाठनका लागि थप सहज हुने अपेक्षा गरिएको छ ।
यसैबीच, बेनी नगरपालिका ६ का वडासदस्य राधिका विश्वकर्माको नेतृत्वमा सहयोगी संस्थाका प्रतिनिधिलाई स्वागत तथा सम्मान गरिएको थियो ।
