राष्ट्रपति निर्वाचनलागि आजदेखि माैन अवधि सुरू, प्रचार प्रसार पूर्णरूपले निषेध

काठमाडौं, २२ फागुन । राष्ट्रपतिको निर्वाचनका लागि आज रातिदेखि माैन अवधि सुरू हुनेछ ।

निर्वाचन आयोगले आज फागुन २२ गते राति १२ बजेदेखि राष्ट्रपतिको निर्वाचन प्रचार प्रसार गर्न निषेध गरेको हाे ।

आयोगले राष्ट्रपतिका लागि मतदानको दिन फागुन २५ गते मतदान केन्द्र बन्द नभएसम्मका लागि प्रचारप्रसार निषेध गरिएको छ ।

यो अवधिमा निर्वाचन प्रचारप्रसार लगायत कुनै पनि प्रकारका छलफल, अन्तक्रिया, सभा, सम्मेलन, कार्यशाला, गोष्ठी आदि गर्न निषेध गरिएको निर्वाचन आयोगका प्रवक्ता शालिग्राम शर्मा पौड्यालले जानकारी दिए ।

यसैगरी उम्मेदवाको पक्ष वा विपक्षमा कुनै पनि प्रकारको प्रचारप्रसार गर्न, मत माग्न, एसएमएस, फेसबुक, भाइबरजस्ता विद्युतीय माध्यमद्वारा प्रयोग गरिने सामाजिक सञ्जालबाट मत माग्न पनि पाइँदैन ।

आयोगले आचारसंहिता विपरीत वक्तव्य दिन, प्रेस विज्ञप्ति निकाल्न, प्रकाशन तथा प्रसारण गर्न, सञ्चारमाध्यमबाट जीत/हारको पूर्वानुमानका सामग्रीहरु प्रसारजस्ता कार्य गर्न नहुने भएको हुँदा यस्ता आचरणहरु पालना गर्न/गराउन सम्बन्धित सबैलाई आग्रह गरेको छ ।