संवैधानिक इजलास गठनमा विवाद छैन : प्रधानन्यायाधीश राउत
काठमाडौँ, ११ भदौ । प्रधानन्यायाधीश प्रकाशमान सिंह राउतले लामो समयदेखि अवरुद्ध संवैधानिक इजलासलाई पूर्णता दिनुभएको छ। उहाँले इजलास गठनमा कुनै विवाद वा मतभेद नरहेको स्पष्ट पार्दै संवैधानिक अधिकार प्रयोग गरेरै इजलास गठन गरिएको बताउनुभएको हो।
आज गठन भएको नयाँ संवैधानिक इजलासमा प्रधानन्यायाधीश राउतसहित वरिष्ठ न्यायाधीशहरू सपना प्रधान मल्ल, डा. नहकुल सुवेदी, तिलप्रसाद श्रेष्ठ र विनोद शर्मा रहनुभएको छ।
पत्रकारहरूसँग कुरा गर्दै प्रधानन्यायाधीश राउतले न्यायाधीश नियुक्ति र सरुवा जस्ता अत्यावश्यक प्रशासनिक कार्यका कारण इजलास गठनमा ढिलाइ भएको तर यसलाई लिएर कुनै विवाद नभएको बताउनुभयो। “संविधानले नै मलाई दिएको अधिकार प्रयोग गरेर इजलास गठन गरेको हुँ,” उहाँले भन्नुभयो, “यस विषयमा बाहिर फैलाइएका भ्रमहरू सत्य होइनन्।”
नेपालको संविधानको धारा १३७ मा प्रधानन्यायाधीशको अध्यक्षतामा न्याय परिषद्को सिफारिसमा प्रधानन्यायाधीशले तोकेका अन्य चार न्यायाधीश रहने संवैधानिक इजलासको व्यवस्था छ।
प्रधानन्यायाधीश राउतले अदालतको गरिमा, मर्यादा र पारदर्शिता कायम गर्न आफू प्रतिबद्ध रहेको बताउनुभयो। उहाँका अनुसार, सर्वोच्चको पूर्ण बैठक (फुलकोर्ट) मा पनि इजलासलाई व्यवस्थित गर्नेबारे छलफल भए पनि कुनै विवाद भएको थिएन।
केही समय रोकिएर आजदेखि पुनः सञ्चालनमा आएको संवैधानिक इजलासमा हाल २२८ वटा मुद्दा विचाराधीन अवस्थामा छन्।
