काठमाडौं, ९ असाेज । लगातार भइरहेको वर्षासँगै सम्भावित पहिरो तथा सडक अवरोधको जोखिम बढेपछि काठमाडौं उपत्यकाबाट बाहिरिने सम्पूर्ण सवारीसाधन नागढुंगामा होल्ड गरिएको छ।

बिहीबार साँझ ८ बजेदेखि यात्रुवाहक तथा मालवाहक सवारीसाधन, मोटरसाइकललगायतका सवारीसाधनलाई नागढुंगा क्षेत्रमा रोकिएको हो।

वर्षाका कारण नागढुंगा–नौबिसे सडकखण्डमा पहिरो जाने, ढुंगा खस्ने तथा सडकमा लेदो आउने जोखिम रहेकाले सुरक्षा सतर्कताका रूपमा सवारीसाधन रोकिएको जनाइएको छ।

नागढुंगा हुँदै धादिङ, चितवन, पोखरा, गोरखालगायत जिल्लातर्फ जाने लामो दूरीका बस तथा मालवाहक सवारीसाधनसमेत होल्डमा परेका छन्। सवारीसाधन रोकिएपछि यात्रु तथा चालकहरू प्रभावित भएका छन्।

सडक र मौसमको अवस्था हेरेर जोखिम कम भएपछि मात्रै सवारीसाधनलाई गन्तव्यतर्फ पठाइने तयारी गरिएको छ। सम्बन्धित सुरक्षा निकाय तथा निकायबीचको समन्वयमा अवस्था सामान्य भएपछि सवारीसाधन क्रमशः सञ्चालन गरिने जनाइएको छ।

सम्भावित जोखिमलाई ध्यान दिँदै यात्रुलाई अनावश्यक यात्रा नगर्न तथा लामो दूरीको यात्रा गर्नुअघि सडकको अवस्था बुझेर मात्रै प्रस्थान गर्न आग्रह गरिएको छ। लगातारको वर्षाका कारण नागढुंगा–नौबिसे सडकखण्डमा सवारीसाधनको चाप बढ्न सक्ने भएकाले यात्रुलाई धैर्य गर्नसमेत अनुरोध गरिएको छ।